कांग्रेसको नेतृत्व एमालेलाई स्वीकार्य हुने

काठमाडौं, ५ असोज । आज शुक्रवार बस्ने चार दलको बैठकले तत्काल प्रधानमन्त्री डा. बाबुराम भट्टराईलाई पदमुक्त गर्दै नयाँ सहमतिको सरकार गठन गर्ने विषयलाई टुङग्याउनु पर्ने धारणा एमाले नेता भीम रावलले अघिसारेका छन् । उनले अबको नेतृत्व कांग्रेसको भए त्यो एमालेलाई स्विकार्य हुने भन्दै एमालेले तत्कालै सरकारको नेतृत्व दावी नगर्ने स्पष्ट पारे ।

रावलले आगामी संविघानसभाको निर्वाचनसँगै संविधानका विवादित विषयमा जनमत संग्रह र स्थानीय निकायको निर्वाचन पनि संगसंगै गर्नुपर्ने मौलिक धारणा अगाडि सारे । उनले अब निर्वाचित हुने संविधानसभा पहिलाको जस्तो अनन्त कालको लागि हुन नसक्ने भन्दै एक वर्षमा संविधान लेखेर जारी गर्ने गरी र बाँकी समय संसदको रुपमा कार्य गर्ने गरी निर्वाचन गर्नुपर्ने बताए । रावलले भने– ‘एक वर्षमा नभए थप तीन महिना समय दिने त्यसमा पनि नभए जनमत संग्रहमा जाने गरी ब्यवस्था गर्नुपर्छ ।’