‘प्रमुख सचेतकबाट देव गुरुङलाई हटाउनुको औचित्य छैन’

काठमाडौं । नेकपा प्रचण्ड–माधव समूहले प्रमुख सचेतकबाट देव गुरुङलाई हटाएकोमा आपत्ति जनाएको छ । सोमबार बिहान बसेको सचिवालय बैठकले प्रधानमन्त्री केपी शर्मा ओलीले प्रमुख सचेतकबाट देव गुरुङलाई हटाइनुको अर्थ र औचित्य नभएको निष्कर्ष निकालेको हो ।

प्रधानमन्त्री संसदीय दलको प्रमुख सचेतकबाट देव गुरुङलाई हटाएको विषयमा बैठकमा छलफल भएको प्रवक्ता नारायणकाजी श्रेष्ठले जानकारी दिए । उनले प्रधानमन्त्रीको निर्णयको कुनै अर्थ र ‍औचित्य नरहेको निष्कर्ष बैठकले निकालेको जानकारी दिए । साथै सो बैठकले तत्काल स्थायी कमिटी र केन्द्रीय कमिटी बैठक बोलाउने निर्णय गरेको छ ।

बैठकले प्रतिनिधिसभा पुनःस्थापनापछि उत्पन्न राजनीतिक परिस्थितिबारे छलफल गर्न स्थायी कमिटी र केन्द्रीय कमिटी बैठक बोलाउने निर्णय भएको प्रवक्ता श्रेष्ठले जानकारी दिए । साथै, बैठकले निर्वाचन आयोगमा पार्टीको आधिकारिताबारे पेस गरिएको दावीमा छिटोभन्दा छितो निर्णय गर्न अनुरोध गर्ने निर्णय पनि गरेको छ ।