किन भेट्यो एनआरएनए टोलीले कानून आयोगका अध्यक्ष पौडेलसँग ?

काठमाडौं । गैरआवासीय नेपाली संघ (एनआरएनए) अध्यक्ष कुमार पन्तको नेतृत्वमा गएको टोलीले कानून आयोगका अध्यक्ष माधव पौडेलसँग गत आइतबार भेट भयो । भेटमा गैरआवासीय नेपाली नागरिकता र गैरआवासीय नेपाली सम्बन्धी ऐन २०६४ संशोधन २०७७ सम्बन्धमा छलफल भएको एनआरएनए सचिवालयले जनाएको छ ।

कानून आयोगका अध्यक्ष पौडेलले संघका पदाधिकारीहरुले गैरआवासीय नेपाली सम्बन्धी ऐन २०६४ को संशोधनका लागि खेलेको भूमिका र त्यसको परिर्माजनमा आयोगसँग गरेको समन्वय र सहकार्यको लागि कृतज्ञता व्यक्त गरे । उनले संघले जनवरी २०२० मा आयोगलाई पेश गरेको सुझाव मध्य अधिकांश समावेश भएको जानकारी गराए । केही सुझावहरु बिषयगत जटिलताका कारण अन्तर मन्त्रालय सहमति हुन नसकिएकोले सम्बोधन हुन नसकेको समेत बताए ।

अध्यक्ष पौडेलले गैरआवासीय नेपाली नागरिकतासम्बन्धी ऐनको मस्यौदा आयोगले तयार नपारेको र गैरआवासीय नेपाली नागरिकता बिषयभन्दा पनि अन्य बिषयहरुका कारण केही ढिलाई भएको बताए । उनले गैरआवासीय नेपाली सम्बन्धी ऐन २०६४ (२०७७ को संशोधन सहित) मा मन्त्रीपरिषद र संसदमा हुने छलफल र संशोधनमा संघले फेरि आफ्ना सुझावहरु राख्न सक्ने भएकोले अध्यादेशमार्फत ऐन ल्याउन उपयुक्त नहुने राय व्यक्त गरे ।

सो अवसरमा संघका अध्यक्ष पन्तले गैरआवासीय नेपाली सम्बन्धी ऐन २०६४ (२०७७ को संशोधन सहित) तयार पार्न आयोगले निभाएको भूमिका र संघसंग गरेको समन्वय र सहकार्यको लागि कृतज्ञता प्रकट गर्दै आयोगले संघले अघि सारेको प्राय धेरै जसो बुंदाहरु समावेश गर्न प्रयास गरेकोमा धन्यवाद दिए । अध्यक्ष पन्तले गैरआवासीय नेपाली ऐन २०६४ (२०७७ को संशोधन सहित) गैरआवासीय नेपाली नागरिकता ऐन जारी भएपछि ल्याउँदा उपयुक्त तथा व्यवहारीक हुने राय पेश गरेको एनआरएनए सचिवालयले जनाएको छ ।

सो भेटको अवसरमा संघका संरक्षक तथा पूर्व अध्यक्ष जीवा लामिछाने, उपाध्यक्षहरु डा. बद्री केसी, सोनाम लामा र रविना थापा, खगेन्द्र जीसीको सहभागिता थियो । आयोगको तर्फबाट सचिवसहित अन्य पदाधिकारीको सहभागिता रहेको थियो ।