गाई काट्दाकाट्दै दुई पक्राउ

लमजुङ, १ भदौ । उत्तरी लमजुङको भुलभुले गाविस–२ सोदीखोलामा गाई काटिरहेको अवस्थामा प्रहरीले दुईजना स्थानीयलाई रङ्गेहात पक्राउ गरेको छ । खुदी प्रहरी चौकीबाट गस्तीमा खटिएका प्रहरी जवानहरुले गाई काटिरहेको अवस्थामै अभियुक्तहरुलाई भेटेका थिए । सो बारेमा जिल्ला प्रहरी कार्यालयमा खबर गरेपछि जिप्रका लमजुङबाट खटिएका प्रहरी घटनास्थलमा पुगी २ जनालाई पक्राउ गरेको हो । पक्राउ पर्नेहरुमा सिम्पानी गाविस वडा नं ९ बस्ने बर्ष ६० का मनबहादुर तामाङ र भुलभुले गाविस वडा नं ३ बस्ने बर्ष ४७ का रामप्रसाद तामाङ रहेको प्रहरीले जनाएको छ । प्रहरीले घटनास्थलबाट गाईको मासु समेत बरामद गरेको बताइएको छ ।