आज बाबुको मुख हेर्ने दिन

काठमाडौं, १ भदौ । कुशे औंशीका दिन आज शुक्रबार हिन्दु धर्मावलम्वी वर्षभर देव तथा पितृकार्यमा प्रयोग गरिने पवित्र कुश घर–घरमा भित्र्याउंदै छन् । शास्त्रोक्त विधिअनुसार ब्राम्हणद्वारा पूजा गरी छेदन गरेर यजमानकहां पु¥याइएको कुश घरमा राख्नाले परिवारको कल्याण हुने धार्मिक विश्वास छ । हिन्दुहरु कुश, तुलसी, पिपल र शालिग्रामलाई भगवान बिष्णुको प्रतीक मान्दछन् ।
गोकर्णे औंशीका नामले पनि चिनिने यस पर्वमा छोराछोरीले परम्पराअनुसार आ–आफ्ना बाबुलाई मनपर्ने मिठाइ तथा भोजन खुवाई आदर–सम्मान गर्दछन् । बाबु नहुनेहरु विभिन्न पवित्र स्थानमा गई आफ्ना बाबुको नाममा तर्पण तथा श्राद्ध गरी सिदा दान गर्दछन् । आजको दिन विशेष गरी उत्तरगया भनेर चिनिने काठमाडौंको गोकर्णेश्वर महादेव र रसुवाको वेत्रावती, नुवाकोटको देवीघाट, तनहुंको देवघाटलगायतका तीर्थस्थानमा दिवंगत बाबुको नाममा तर्पण तथा सिदा दान गर्नेको घुईंचो लाग्ने गर्छ ।