यस्ता छन् नवनियुक्त पर्यटनमन्त्री भट्टराईका प्रतिवद्धता

१६ श्रावण २०७६, बिहीबार ११:०८ मा प्रकाशित

काठमाडौँ, १६ साउन । नवनियुक्त संस्कृति, पर्यटन तथा नागरिक उड्डयनमन्त्री योगेश भट्टराईले मुलुकको इज्जत र जनताको अपेक्षा पूरा गर्नेतर्फ आफूले ध्यान केन्द्रित गर्ने बताएका छन् । मन्त्रालयमा पदभार ग्रहणपछि आयोजित स्वागत समारोहमा मन्त्री भट्टराईले भने , “तपाईहरुले मलाई काम लगाउनुहुनेछ, कस्तो काम गर्दा मुलुकको इज्जत बढ्छ, प्रधानमन्त्रीले र जनताले सोचेको अपेक्षा पूरा हुन्छ, के गर्दा चुनौतीमाथि सफलता हासिल हुन्छ, भोलिका दिनमा विषयगत हिसाबले छलफल गरेर जानेछु ।”

केही दिनभित्रैमा प्रधानमन्त्रीसमक्ष मन्त्रीको हिसाबले कामको करार सम्झौता गर्ने उल्लेख गर्दै मन्त्री भट्टराईले भने , “हामी जे गर्न सक्छौँ, त्यो कुरा भन्छौँ, जे हुन सक्दैन, त्यो के कारणले भएन भनेर पारदर्शी ढङ्गले बताउने छौँ ।” निर्देशन कम हुने र सामूहिक निर्णयबाट अघि बढ्ने बताउँदै उहाँले प्रधानमन्त्रीले राखेको आशा र अपेक्षा पूरा गर्र्ने उल्लेख गरे ।

कुनै पूर्वघोषित कार्यक्रम नभई परिस्थितिले आफू मन्त्री हुन आइपुगेको प्रष्ट्याउँदै उनले कसैलाई काम लगाउन होइन काम सिक्न आएको बताए । राष्ट्रिय गौरवका आयोजनालाई समयमै सक्ने तथा सन् २०२० को नेपाल भ्रमण वर्ष साकार पार्ने मन्त्री भट्टराईले प्रतिबद्धता जनाए ।

मुलुकलाई समृद्ध बनाउने राष्ट्रिय आकाङ्क्षा पूरा गर्न कुनै कसर बाँकी नराख्ने मन्त्री भट्टराईको भनाइ थियो । नेपाल वायुसेवा निगमको विश्वसनियता कायम गर्नेसमेत उनले प्रतिबद्धता जनाए । सञ्चारमाध्यमलाई कुनै पनि बधाई नछाप्न अनुरोध गर्र्दै उनले मन्त्रीका रुपमा नियुक्तिका लागि सहयोग गर्ने पार्टीका नेतृत्वप्रति आभार प्रकट गरे ।

मन्त्री भट्टराईले विसं २०७५ फागुन १५ गते तत्कालिन मन्त्री रवीन्द्र अधिकारीको दुःखद् निधनले असल युवा राजनीतिकर्मी र घनिष्ट मित्र गुमाएको स्मरण गरे । उनले परिस्थिति र घटनाक्रमले अधिकारीको कुर्सीमा आफू आइपुगेको बताए ।

“यो मन्त्रालयलाई उहाँकै नेतृत्व आवश्यक थियो, प्रधानमन्त्रीले सही चयन गर्नुभएको थियो, अफसोच प्रकृतिसँग हामीले जित्न सकेनौँ र उहाँलाई अल्पआयुमै गुमाउन पुग्यौँ, उहाँको एउटा उत्तराधिकारी जस्तो भएर म आएको छु, यसोभन्दा मलाई कुनै हिनताबोध छैन, गर्व छ”, मन्त्री भट्टराईले भने ।

अधिकारीले यो मन्त्रालयमा जे कदम उठाउनुभएको थियो, त्यो कामलाई आगामी दिनमा अझै माथि बढाउने विश्वास व्यक्त गर्दै उहाँले यसअघि जिम्मेवारी सम्हालिसक्नु भएकाको सल्लाह लिएर अघि बढ्ने प्रतिबद्धता व्यक्त गरे । मन्त्री भट्टराईले आफू सञ्चारजगत्सँग नभाग्ने प्रतिबद्धता जनाए । सञ्चारजगत्बाट नभागी सँगसँगै अघि बढ्ने बताउँदै उहाँले आजको दिनमा मिडियाको भूमिका ठूलो रहेको उल्ल्ेख गरे ।

देश बनाउने अभियानमा सञ्चारमाध्यामको सहयोगी भूमिका रहने उल्लेख गर्दै भने, “हामी तपाईहरुको निगारनीमा छौँ, म अपेक्षा गर्दछु कि देश बनाउने दायित्व प्रधानमन्त्रीको, मन्त्रीको, मन्त्रालयका सचिव या कर्मचारीको मात्रै होइन हामी सबैको हो, सञ्चारकर्मीको पनि हो ।” व्यक्तिगत र गोप्य कुराबाहेक पत्रकारका निम्ति मन्त्रालय सधँै खुला रहेकोसमेत उनले बताए । आजको दुनियाँ पारदर्शी र जवाफदेही रहेको, संविधानतः प्रधानमन्त्री र संसद्प्रति एकसाथ जवाफदेही रहेकाले हर काम सहभागितामूलक हुने उनको भनाइ थियो ।

मन्त्रालयका काममा केही चुनौती रहेको बताउँदै मन्त्री भट्टराईले नेपाल भ्रमण वर्ष २०२० लाई सफल बनाएरै छाड्ने जिकिर गरे । “सन् २०२० को जुन लक्ष्य छ, हामी पुग्छौँ, त्यसका निम्ति मन्त्रालयको सम्पूर्ण तागत र शक्तिका साथ अगाडि बढ्छौँ, कहाँकहाँ कमजोरी छ, त्यसलाई सच्याएर जान्छौँ”, मन्त्री भट्टराईले भने।

उनले पोखरा अन्तर्राष्ट्रिय विमानस्थल, गौतमबुद्ध अन्तर्राष्ट्रिय विमानस्थल जस्ता गौरवका आयोजना सके समयभन्दा पहिले नै भएन भनेपनि तोकिएको समयभित्र सम्पन्न गरी आउने भ्रमण वर्षलाई सफल बनाउने गरी अघि बढ्ने बताउँदै भने , “प्रगति कहाँ पुगेको छ छलफल गर्छौं, सहमति जुटाउने प्रयास गर्छौं, भएका आशङ्का मेटाउने गरी सकेसम्म आउने कार्यकालमै सम्पन्न गर्नेछौँ ।” त्यो काम अति आवश्यक र निर्विकल्प रहेकोसमेत मन्त्री भट्टराईको भनाइ थियो ।

नेपाल वायुसेवा निगममाथि टिप्पणी भइरहेको अवस्थामा त्यसको विश्वसनियतालाई माथि उठाउने प्रतिबद्धता जनाउँदै मन्त्री भट्टराईले भने , “वाह १ नेपाल एयरलाइन्स भन्ने बनाउने छौँ, त्यसका निम्ति छलफल अगाडि बढाउने छौँ ।” अन्य आन्तरिक विमानस्थलको सुदृढीकरण, विस्तार गरी निजी सहयोगी संस्थासँग हातेमालो गरेर अघि बढ्ने उनले उल्लेख गरे ।

प्रतिक्रिया
सम्बन्धित खवर

काठमाडौं । सत्ता गठबन्धनको महत्त्वपूर्ण घटक नेकपा (एकीकृत समाजवादी)का अध्यक्ष माधवकुमार नेपालले आउँदो साताभित्र मन्त्रिपरिषद् विस्तारले पूर्णता पाउने संकेत गरेका

काठमाडौँ । कोरोना भाइरसविरुद्धको खोप उपत्यकामा अधिकांशले लगाइसकेका छन् । यो खोप उपत्यकामा पहिलो मात्रा ४४.३३ प्रतिशत र पूर्ण मात्राको

काठमाडौं । नेकपा (एकीकृत समाजवादी)का अध्यक्ष माधव कुमार नेपालले एक हप्ताभित्र मन्त्रिपरिषदले पूर्णता पाउने दाबी गर्नुभएको छ । मिनभवनस्थित केन्द्रीय

काठमाडौं । नेपाली राजनीतिमा प्रधानमन्त्री शेरबहादुर देउवाकाे नियति मान्नुपर्छ, आफूले पाएकाे जिम्मेवारी पूरा गर्न नसकेकाे अवगाल उहाँले पटक-पटक ब्यहाेर्नु परेकाे