अनलाईन कारोबारमा म पनि विश्वस्त छैनः अर्थमन्त्री खतिवडा

निरोज कुमार थापा, काठमाडौँ, १७ असार । अर्थमन्त्री डा. युवराज खतिवडाले प्रविधि मार्फत हुने वित्तीय कारोबारमा आफूलाई विश्वास नलाग्ने बताएका छन् । नेपाल धितोपत्र बोर्डले आयोजना गरेको अन्तराष्ट्रिय वित्तीय साक्षरता सम्मेलनको उद्घाटन गर्दै मन्त्री खतिवडाले नेपालमा पाँच प्रकारका वित्तीय संस्था भए पनि नेपाली जनतामा सबै उस्तै हुन् भन्ने अवस्था रहेको बताए ।

‘म जस्तो व्यक्तिलाई त प्रविधि मार्फत गरिने कारोबारप्रति आत्मबिश्वास छैन, अरुको के होला’ खतिवडाले भने ‘नेपालमा पर्याप्त वित्तीय साक्षरता नभएका कारणले त्यसमा काम गर्नु पर्ने अवस्था छ ।

पूँजीबजारलाई लिएर नेपालमै पहिलो पटक आयोजना भएको अन्तराष्ट्रिय वित्तीय साक्षरता सम्मेलन आजदेखि सुरु भएको हो । सम्मेलन दुई दिनसम्म चल्नेछ । सम्मेलनमा अमेरिका, दक्षिण अफ्रिका, अस्ट्रेलिया, काजकिस्तान, सिंगापुर, थाइल्यान्ड, भुटान, चीन र भारत लगायत देशका साथै सम्बद्ध अन्य संस्थाको पनि सहभागिता छ ।