पप्पु कन्स्ट्रक्सनलाई कारबाही सिफारिस

निरोज कुमार थापा, काठमाडौँ, ३१ जेठ । संसदको विकास तथा प्रविधिले निलम्बित सांसद हरिनारायण रौनियार मालिक रहेको पप्पु कन्स्ट्रक्सनलाई कारवाही सिफारिस गरेको छ । काठमाडौँको तीनकुने र मीनभवन जोड्न वाग्मती नदीमाथि निर्माण भइरहेको पक्की पुल गुणस्तरहीन भएको भन्दै समितिले दिएको पालना नगर्ने पप्पु कन्टलाई समितिले कारबाही सिफारिस गरेको हो ।

समितिले तीनकुने पुलमा देखिएको प्राबिधिक समस्या समाधान गरी निर्माण सुरु गर्ने वाताबरण बनाउन सम्बन्धित निकायलाई निर्देशन दिएको छ ।

२१ करोड ३३ हजारमा तीनकुनेका २ वटा पुल निर्माणको ठेक्का पाएको पप्पुले कमसल निर्माण सामग्री प्रयोग गरेको भन्दै सडक विभागले काम रोक्न भनेको थियो । तर विभागको पत्रलाई वेवास्ता गरी पप्पुले निर्माण कार्य नरोकेपछि उसको भुक्तानी रोकिएको छ ।

पुल निर्माणमा लापरवाही भएको भन्दै सांसदहरुले प्रश्न उठाएपपछि समितिकी सभापति कल्याणी खड्का नेतृत्वको टोलीले गत जेठ २ गते पुल निर्माणको स्थलगत अध्ययन गरेको थियो ।