संविधानसभाको होईन संसदको निर्वाचन हुनुपर्छः नेपाल

४ श्रावण २०६९, बिहीबार १६:२० मा प्रकाशित

काठमाडौ, ४ साउन । नेकपा (एमाले) का वरिष्ठ नेता तथा पूर्वप्रधानमन्त्री माधवकुमार नेपालले वर्तमान सरकारले तोकेअनुसार आगामी मङ्सिर ७ गते संविधानसभाको निर्वाचन हुने कुनै गुञ्जयास नभएकाले अब संसदीय निर्वाचन हुनुपर्ने बताउनुभएको छ ।
नेपाल शिक्षक युनियनको तीनदिने पाँचौ राष्ट्रिय परिषद् बैठकको आज यहाँ उद्घाटन गर्दै नेता नेपालले कुनैपनि मुलुकमा सरकारलाई संविधानसभाको मिति तोक्ने अधिकार नभएकाले अब यो सरकारको विस्थापन गरी संविधानका विवादित मुद्दामा सहमति गरेर नयाँ संसद्बाट संविधान जारी गर्नुपर्नेमा जोड दिनुभयो ।
‘सङ्घीयतालगायतका विवादित विषयमा जनमतसङ्ग्रह पनि गर्न सकिन्छ, त्यही समयमा संसद् र स्थानीय निकायको निर्वाचन पनि गर्न सकिन्छ, यो काम यसै वर्षको चैतभित्र गर्नुपर्छ ।’ उहाँले भन्नुभयो ।
एमाओवादीले आफ्नो छापको नयाँ संविधान ल्याउन खोजेको र आफूहरुले लोकतन्त्रको छाप भएको संविधानका लागि प्रयास गरेकाले संविधानसभाका असामयिक अवसान भएको दाबी गर्दै नेता नेपालले सेना र हतियारसहित सो पार्टीलाई सरकार, संसद् र निर्वाचनमा भाग लिन दिएर आफूहरुले गल्ती गरेको पनि उल्लेख गर्नुभयो ।
उहाँले शिक्षकहरुलाई सामाजिक रूपान्तरणमा अग्रसर हुन र गुणस्तरीय शिक्षाका लागि जिम्मेवार बन्न आह्वान गर्दै राज्यले शिक्षा र स्वास्थ्यका क्षेत्रमा लगानी बढाई रोजगारको सुनिश्चित गर्नुपर्नेमा पनि जोड दिनुभयो ।
नेपाली काँग्रेसका केन्द्रीय सदस्य पूर्णबहादुर खड्काले शिक्षकहरुका पेसागत मागप्रति राज्य गम्भीर हुनुपर्ने भन्दै लोकतन्त्रका लागि शिक्षकहरुले गरेको आन्दोलनको सम्मान गरिने बताउनुभयो ।
कार्यक्रममा शिक्षा विभागका महानिर्देशक महाश्रम शर्माले सरकारले शिक्षा ऐनलाई वैकल्पिक उपायबाट संशोधन गरी शिक्षकका माग पूरा गर्ने तयारी गरेको जानकारी दिनुभयो ।

यसैगरी, पूर्व शिक्षामन्त्री रामचन्द्र कुशवाह, राष्ट्रिय जनमोर्चाका मनोज भट्ट, नेपाल प्राध्यापक सङ्घका महासचिव रामेश्वर उपाध्याय, नेपाल शिक्षक युनियनका अधयक्ष दीलहादुर जोशी, नेपाल राष्ट्रिय शिक्षक सङ्गठनका बाबुराम अधिकारी, नेपाल शिक्षक सङ्घका अध्यक्ष मोहन ज्ञवाली, अखिल नेपाल शिक्षक सङ्गठनका अध्यक्ष गुणराज लोहनी, नेपाल बार एसोसिसनका अध्यक्ष प्रेमबहादुर खड्कालगायतले शिक्षकहरुका पेसागत समस्याका बारेमा बोल्नुभएको थियो ।

प्रतिक्रिया
सम्बन्धित खवर

काठमाडौँ । नेपाली काँग्रेसको स्थानीय तह निर्वाचन केन्द्रीय परिचालन समितिले सिट संख्या बढाउन गठबन्धन आवश्यक भएको निष्कर्ष निकालेको छ ।

फर्डिनान्ड रोमुआल्डेज मार्कोस जुनियरले बिहीबार मनिला शहरमा हजारौं मानिसहरूका बीच फिलिपिन्सको १७ औं राष्ट्रपतिको रूपमा शपथ ग्रहण गरेका छन्। मार्कोस

एजेन्सी । दोस्रो विश्वयुद्धमा जापानी फौजलाई आच्छुआच्छु पारेर राष्ट्रपतिबाट सर्वोच्च पदक पाएका हर्शेल डब्ल्यू विलियम्सको ९८ वर्षको उमेरमा मृत्यु भएको

काठमाडौं । प्रधानमन्त्री शेरबहादुर देउवा पत्नी आरजु राणा देउवालाई कोरोनाभाइरस संक्रमण भएको छ । कोरोनाभाइरस संक्रमण भएपछि आरजु केही दिनयता