सुन्तला र जुनार तिब्बत निर्यातको तयारी

३ श्रावण २०६९, बुधबार १७:४३ मा प्रकाशित

काठमाडौँ, ३ साउन । सरकारले सुन्तला, जुनार र निबुवा चीनको स्वशासित क्षेत्र तिब्बत निर्यातको तयारी थालेको छ ।     नेपालका कृषि उत्पादन ‘सिट्रस’ आयात गर्न चीनको स्वशासित क्षेत्र तिब्बतका अधिकारी सहमत भएपछि सरकारले निर्यातको तयारी थालेको हो ।

गत असार २० र २१ गते ल्हासामा भएको द्विपक्षीय बैठकमा नेपाल र चीनको स्वशासित क्षेत्र तिब्बतबीच सिट्रस आयात–निर्यातसम्बन्धी सहमतिमा हस्ताक्षर भएको थियो ।

कृषि विभागका महानिर्देशक श्यामकिशोर साहले उक्त सहमतिमा हस्ताक्षर भएको जानकारी दिँदै बैठकमा सहभागी राष्ट्रिय प्लाण्ट क्वारेण्टाइन कार्यक्रमका प्रमुख ईश्वरप्रसाद रिजालले आगामी यामदेखि सुन्तला, जुनार र निबुवा तिब्बत पठाउने तयारी भइरहेको राससलाई बताउनुभयो ।

विश्व व्यापार सङ्गठनको सदस्य भएकाले नेपालले आफ्ना उत्पादन विश्व बजारमा बेच्नसक्ने बताउँदै उहाँले कृषि विभागले सिट्रस निर्यातको तयारी थालेको जानकारी दिनुभयो ।

‘स्याङ्जाको सुन्तला र रामेछापको जुनारलाई तिब्बती अधिकारीले मनपराए’– नेपाली कृषि उपजको गुणस्तरप्रति तिब्बतीहरू आश्वस्त भएका तथा सिन्धुलीको जुनारसमेत आगामी याममा तिब्बत पठाइने प्रमुख रिजालले बताउनुभयो ।

सिट्रसका साथै केरा, आँप, मौसमी एवम् वेमौसमी सागसव्जी पनि तिब्बत पठाउने प्रयास भइरहेको जानकारी उहाँले दिनुभयो । ‘तिब्बतसँगको उक्त सहमति कार्यान्वयनका निम्ति पर्सी शुक्रबार सम्बद्ध सरकारी अधिकारीहरूसँग बैठक हुँदैछ’– निर्यात तयारीबारे प्रमुख रिजालको कथन थियो ।

ल्हासा बैठकमा व्यापार सहजीकरण, केरुङ र तातोपानी नाकामा भौतिक पूर्वाधार विकास, प्रक्रियागत सरलीकरणलगायत चीनसँगको व्यापार घाटा कम गर्ने सम्बन्धमा पनि छलफल भएको थियो ।

सो बैठकमा वाणिज्य तथा आपूर्ति मन्त्रालय, कृषि तथा भन्सार विभागका वरिष्ठ अधिकारी, नेपाल इन्टरमोडेल यातायात विकास समितिका कार्यकारी निर्देशक तथा ल्हासास्थित नेपालका महावाणिज्यदूतको सहभागिता थियो ।

प्रतिक्रिया
सम्बन्धित खवर

च्याङ्ग्राको शरीरबाट झरेर खेर गइरहेको भुवा (ऊन)ले बजार पाउने सुनिश्चित भएपछि मुस्ताङका कृषकमा खुसियाली छाएको छ । नेपाली पस्मिना उद्योगीहरुले

बागलुङ जिल्लाका काठेखोला गउँपालिका–७ रेश पीपल डाँडाका गिरी थापा र मीन थापा दुई भाइ मात्र होइनन्, पेशाका हिसाबले दुवै जना

डोटी । कोरोना भाइसको जोखिम कायमै रहेका बेला त्यसको बेवास्ता गर्दै सयौँ सुदूरपश्चिमेली काम खोज्नका लागि दिनहुँ भारत पस्न थालेका

चितवन- नयाँ पर्यटकीय गन्तव्यका रूपमा चिनिएको सिन्ती झरना आन्तरिक पर्यटकीय गन्तव्य बन्दै गइरहेको छ । चितवनको कालिका नगरपालिका-९ मा रहेको