लाजिम्पाट–नारायणगोपाल सडक मिचेर बनाइएको घरटहरा भत्काउन सुरु

काठमाडौ, १६ असार । काठमाडौको लाजिम्पाट–नारायणगोपाल सडकमा सडक मिचेर बनाइएको घरटहरा आजबाट भत्काउने काम सुरु भएको छ । सडकलाई २२ मिटर फराकिलो पार्ने योजना भएपनि धेरै घर भत्काउनु पर्ने भएकाले तत्काल सडकलाई १८ मिटर फराकिलो पार्न लगिएको हो । महानगरीय ट्राफिक प्रहरी महाशाखाको सक्रियतामा सडक विस्तारको काम सुरु गरिएको हो । खानी विभाग र नारायण गोपालचोकमा डोजरले सडक विस्तार गर्ने काम भइरहेको हो । सडक विस्तारका क्रममा कुनै पनि अप्रिय  घटना नहोस भन्नका लागि ठाउँ ठाउँमा सुरक्षा टोली खटाइएको छ । राष्ट्रपति तथा  प्रधानमन्त्री कार्यालय वरिपरिका निषेधित ठाउँमा भने सशस्त्र प्रहरी परिचालन गरिएको छ ।  नगर विकास समितिले २२ मिटरसम्म कुनै पनि संरचना बनाउन नपाइने भने पनि मापदण्ड विपरित घरटहराहरु बनाइएको छ ।