नयाँ पार्टी गठनका लागि शरतसिंह भण्डारी पक्षको भेला राजधानी जारी

काठमाडौ, १३ असार । मधेसी जनअधिकार फोरम लोकतान्त्रिकबाट कारवाहीमा परेका शरतसिंह भण्डारी पक्षले आजदेखि राजधानीमा राष्ट्रिय भेला शुरु गरेको छ । नयाँ पार्टी गठनका लागि हुन लागेको भेलामा आज पहिलो दिन नयाँ पार्टीको नाम, विधान, झन्डा र चिन्हका विषयमा छलफल हुने नेताहरुले बताएका छन् । आज दिनभरि छलफल गरी भोलि नयाँ पार्टी घोषणा गर्ने तयारी गरिएको छ । भेलामा २७ जिल्लाबाट २५ सय भन्दा बढी प्रतिनिधिहरू सहभागी भएको दाबी गरिएको छ । जनअधिकार फोरम लोकतान्त्रिकमा रहनुभएका भण्डारीलाई अनुशासन उल्लङ्घन गरेको आरोपमा जेठ २३ गते निष्कासन गरिएको थियो ।