कुटनीतिक नियोगसँग छलफल सुरु

काठमाण्डौ जेठ ५ । अर्थमन्त्री डा.रामशरण महत र नेपालस्थित विभिन्न मुलुकका राजदूतहरुबीच नेपाल सहायता सम्मेलनबारे अर्थमन्त्रालयमा बेग्लाबेग्लै छलफल भएको छ ।
अर्थमन्त्री डा.महतसँग नेपालका लागि अमेरिकी राजदूत पीटर डब्ल्यु बोडे, जर्मनीका राजदूत म्याथ्यु मेयर तथा चीनका राजदूत उ चुन्ताईले भेटघाट गरी नेपाल सहायता सम्मेलनबारे छलफल गर्नुभएको छ ।
भारतीय राजदूत रञ्जित रेले भने सम्मेलनका विषयमा यसअघि नै छलफल गर्नुभएको थियो ।
भेटघाटका क्रममा अर्थमन्त्री महतले नेपालको वार्षिक बजेट पेश हुने समय निकट आइरहेको र पुनर्निर्माणको कामका लागि स्रोतको व्यवस्था गर्न सहायता सम्मेलन छिट्टै गर्न लागिएको जानकारी गराउनुभएको थियो ।
उक्त सम्मेलनमा मित्रराष्ट्रहरुबाट उच्चस्तरीय सहभागिता अपेक्षा गरिएको स्पष्ट पार्दै उनले यो विपद्को अवस्थामा बढी सहयोगको अपेक्षा गरिएको जानकारी गराउनुभयो ।