मंगलबार ७.३ रिक्टर स्केलको अर्को शक्तिशाली भूकम्प, कम्तिमा ६१ जनाको मृत्यु, ११ सय घाइते सम्पर्कमा

काठमाडौँ, ३० वैशाख । मंगलबार मध्याह्न १२ बजेर ५० मिनेट जाँदा सिन्धुपाल्चोक र दोलखाको सिमानालाई केन्द्रबिन्दु बनाएर ७.३ रिक्टर स्केलको भूकम्प गएको अमेरिकी भुगर्व केन्द्रले जनाएको छ । अमेरिकी भुगर्व केन्द्रका अनुसार आजै अपराह्न १ बजेर २१ मिनेटमा पनि दोलखालाई केन्द्रबिन्दु बनाएर अर्को ६.२ रिक्टर स्केलको अर्को कम्पन गएको थियो । त्यसैगरी, १ बजेर ५८ मिनेट जाँदा सिन्धुपाल्चोक केन्द्रबिन्दु भएर ५.३ रिक्टर स्केलको अर्को कम्पन गएको थियो । भूकम्पमा परि अहिले सम्म ६१ जनाको मृत्यु भैसकेको छ हजारौ घाइते सम्पर्कमा आएका छन् । मंगलबारको भूकम्पमा परी ११ जिल्लाका ६१ जनाको मृत्यु भएको छ । मृत्यु हुनेको संख्या दोखलामा सबैभन्दा बढी छ । दोखलामा ३४ जनाको मृत्यु भएको जिल्ला प्रहरी कार्यालय दोलखाले जनाएको छ ।

उता नेपाल सरकारको आधिकारिक निकाय राष्ट्रिय भुकम्प मापन केन्द्रले भने मंगलबार दिउँसो १२:५० बजे सिन्धुपाल्चोकलाई केन्द्रविन्दु बनाएर ६ दशमलब ८ रेक्टर स्केलको भूकम्प गएको बताएको छ  । बैशाख १२ गते महाभूकम्प गएपछि भएको एक सय बढी पराकम्पनपछि अर्को शक्तिशाली भूकम्प गएको हो । भूकम्पमा परी देशभर ११ सय बढी घाइते भएको प्रहरीले जनाएको छ ।कम्पनबाट त्रसित भएका सर्वसाधारणको टुडिँखेललगायत खुलास्थानमा भीड लागेको छ । रेडक्रसजस्ता समाजसेवी संस्थाले सर्वसाधारणलाई धर्य रहन र नआत्तिन आग्रह गर्दै माइकिङ गरिरहेका छन् । भैँचालोबाट घाइते भएकालाई राजधानीका अस्पतालमा ल्याउनेक्रम जारी छ ।

जिल्ला र मृतक संख्या:

दोलखा ३४

सिन्धुपाल्चोक ११

काठमाडौ ४

रामेछाप ४

सिन्धुली २

ललितपुर १

धनुषा १

सर्लाही १

सुनसरी १

रौतहट १

गोरखा १