कांग्रेस संविधानसभा पुनस्र्थापनाको पक्षमा छैन रामचन्द्र पौडेल (उपसभापति, नेपाली कांग्रेस)

२५ जेष्ठ २०६९, बिहीबार १४:१९ मा प्रकाशित

काङ्ग्रेस, एमाले लगायतका दलहरु यतिबेला जनप्रदर्शनमा किन ओर्लिएको उपसभापतिज्यू ?
– देशलाई निरङ्कुशतातिर बढाउन खोजिएको छ । संविधानसभा तथा व्यवस्थापिका संसद सून्य गराएर मुलकमा सत्ता कब्जाको रणनीतिमा माओवादी पार्टी अगाडि बढ्दैछ । त्यसलाई ध्यानमा राखेर मुलुकको लोकतन्त्रलाई रक्षा गर्न, संघीय लोकतान्त्रिक गणतन्त्रको संस्थागत विकासको वातावरण बनाउन हामी जनप्रदर्शनको आयोजना गर्दैछौं ।

जनप्रदर्शनले निकास दिने होइन द्वन्द्व बढाउंछ भनिएको छ नि ?
– हेर्नुहोला यसले द्वन्द्व बढाउंदैन अन्त्य गर्न नै सघाउंछ ।

राजनीतिक ध्रुवीकरण बढाउंदैन र यस्तो आयोजनाले ?
– राजनीतिक ध्रुवीकरणको अवस्था निम्तियोस् भन्ने हामी चाहंंदैनौं तर ध्रुवीकरण गराउन खोजिंदैछ भन्ने अनुभूति चाहिं हामीलाई पनि भएको छ । लोकतन्त्रवादी र लोकतन्त्रविरोधि कित्तामा राजनीतिक रुपले देशलाई विभक्त गर्न खोजिंदैछ । तर हामी त्यसको प्रतिवाद गर्छौं ।

अहिलेको राजनीतिक समस्याको निकासचाहिं के हो त ?
– छलछामको बाटो छोडेर, सत्ता कब्जा र निरंकुशताको बाटो छोडेर माओवादीले इमानदारिता देखाउनु पर्छ । पांचबुंदे सहमतिलाई कार्यान्वयन गराउने प्रतिवद्धता जाहेर गर्नुपर्छ । बाबुराम भट्टराईले राष्ट्रिय सहमतिको सरकार निर्माणको लागि कुर्सी छोडेर सहयोग गर्नुपर्छ । माओवादीले यत्ति गरिदिए सहमतिको निकास खुल्छ ।

बबुरामजीले त मैले राजीनामा गरेसरहको अवस्था हो, कसलाई प्रधानमन्त्री बनाउने हो तपाईंहरु मिलेर आउनुस् अनि छोडौंला भन्नुभएको छ नि ?
– उहां अहिले पनि छलछामकै बाटोमा लागिरहनुभएको छ । बाबुरामजीले इमानदार प्रयास गरिराख्नुभएको छैन । उहांले इमानदारी देखाउने हो भने सिधै भन्न सक्नुपर्छ कि हामीले पांचबुंदेमा सम्झौता गरिसकेका हौंं, अब त्यही बाटोबाट अघि बढ्छौं । त्यसरी खुला रुपले उहां नआउने र काइते कुरा गर्ने प्रवृत्तिले नै स्पष्ट पारेको छ कि उहांको नियत नै खोटो छ ।

उहांले त निकास खोज्ने कुरा मात्र गर्नुभएको छ, पांचबुंदे सहमति बिर्सिसकेको पो हो कि ?
– पांचबुंदेलाई निर्सेर या पाखा लगाएर निकास आउंदैन भन्ने हेक्का उहांहरुलाई हुनुपर्ने हो , तर जानाजान बुझपचाइरहनुभएको छ । बिडम्वना यही त हो ।

अब के गर्छ त नेपाली कांग्रेस ?
– नेपाली कांग्रेस पांचबुंदे कार्यान्वयन गराउन प्रयत्नशील छ । त्यसैको लागि जनमत निर्माण गरिरहेको छ कांग्रेसले । त्यसैको निम्ति वातावरण बनाइरहेको छ । माओवादीलाई बाध्य तुल्याउने परिस्थिति सिर्जना गराएरै छोड्छौं हामी ।

१४ गते राती संविधानसभाको आयु समाप्त हुनुमा कांग्रेसको दोष कति छ ?
– कत्ति पनि छैन । १४ गते राती १० बजेसम्म माओवादीले सहमति गर्नखोजेको नाटक गरेर पछि एकाएक बाटो बदली देश र जनतालाई धोका दियो । राती १२ बजेसम्म अल्मल्याएर जसरी पनि संविधानसभालाई अन्त्य गरिदिने सुनियोजित योजना उहांहरुको रहेछ । इतिहासले यस अक्ष्यम्य गल्तीका लागि माओवादीलाई उचित सजाय दिनेछ भन्ने हाम्रो ठहर छ ।

कांग्रेस र एमालेकै कारण संविधानसभा सकिएको माओवादीको कथन छ, हामीले कसरी बुझ्ने त यसलाई ?
– गल्ती र अपराधजति आफू गर्ने दोषचाहिं अर्काको टाउकोमा थोपर्ने त माओवादीको एक प्रमुख विशेषता नै हो । कांग्रेस एमालेले संविधानसभा र व्यवस्थापिका संसद अन्त्य गर्न किन चाहने ? हाम्रो हतिहार भनेकै संसद हो । हामी यस्तो लोकतान्त्रिक हतियारबाट निशस्त्र किन हुन चाहन्थ्यौं होला र ? हामी त त्यसलाई बचाउन अनेक विकल्प दिइरहेका थियौं । तर उहांहरुले संसद रहिरहंदा आफ्नो सत्ता हरण हुने सम्भावना देख्नुभयो र त्यसरी संसदको गला निमोठि दिनुभयो । संसद अन्त्य गरेर आफ्नो सत्ताको आयु लम्व्याउन उहांहरुले चाहेको कुराको प्रमाण त अस्ति अन्तरक्रिया कार्यक्रम आयोजना गरेर प्रचण्ड, बाबुराम र विजय गच्छेदारहरु स्वयम्ले स्पष्ट पारिसकेकै छन् नि ।

कांग्रेस संघीयता चाहंदैन भन्नेमा माओवादी र मधेसवादी दलहरुको एउटै स्वर छ नि ?
– सत्ताप्रतिको मोहले मधेसवादी दलहरुले माओवादीको आरोपमा सहमति जनाएर हामीप्रति आक्षेप लगाउनु अस्वाभाविक छैन । कांग्रेस संघीयताविरोधि दल होइन ।

संविधानसभा पुनस्र्थापनाको कुरा पनि उठाएका छन् नि तपाईंको दलका केही पूर्व सभासदहरुले, यो पार्टीको एजेण्डा हो ?
– कांग्रेसले संविधानसभा पुनस्र्थापनाको कुरा गरेको छैन । हाम्रो पार्टीको एजेण्डा होइन त्यो । त्यस्तो कुनै सोच कांग्रेसले अहिले बनाएको छैन ।

पार्टीका वरिष्ठ नेता शेरबहादुर देउवाले त पुनस्र्थापनाको पक्षमा अभिव्यक्ति दिएका छन्, के भन्न्ुहुन्छ ?
– खै उहांले किन त्यस्तो अभिव्यक्ति दिनुभयो । व्यक्तिगत विचार उहांले व्यक्त गर्न त पाइहाल्नुहुन्छ तर पार्टीले त्यस्तो दृष्टिकोण राखेको छैन ।

माओवादीका एउटा खेमाले बृहत गोलमेच सम्मेलनको प्रस्ताव अघिसारेको छ, यो सम्भव छ ?
– राष्ट्रिय सहमतिको खांचो छ, छलफललाई जुन रुप दिए पनि आवश्यकता सहमतिको हो ।

तपाईंहरुको यस्तो आग्रह हुंदाहुंदै प्रधानमन्त्रीले राजिनामा नदिए के गर्नुहुन्छ ?
– जनतालाई आन्दोलित तुल्याउंछौं , त्यस बाटोमा हामी अघि बिढिसकेका पनि छौं । प्रधानमन्त्रीले जबर्जस्त ीगर्न खोजे आमीसंग धेरै उपाय छन् ।

राष्ट्रपतिले के गर्नुहोला समस्या सल्टाउनका लागि ?
– राष्ट्रपतिले चाल्ने कदमबारे मलाई के थाहा हुन्छ र ? म त यत्ति जान्दछु कि परिस्थिति, जनताको चाहना, संविधानको भावना अनुसार संविधानको संरक्षकको भूमिका उहांले निर्वाह गर्नुहोला ।

कांग्रेस जनजातीको भावनाअनुसार हिंडेन भनेर पार्टीकै आदिवासी जनजाती नेता–कार्यकर्ताहरुले पार्टी छोड्ने धम्की दिएका छन् , के भन्नुहुन्छ ?
– यस विषयमा यथार्थभन्दा बढि प्रचार भएको हो, वास्तविकता मोडेर कुरा आएको हो । केही असन्तुष्टि त देखिएको हुनसक्छ तर जनजाती आदिवासी, दलित महिला वा समस्त वर्गलाई समान अधिकारको अवस्थामा ल्याउनका लागि हामी साठी वर्षदेखि लडेका छौं । माओवादी सदनमा आउनुअघि नै हामीले समावेसी विधेयक ल्याएका हौं । हाम्रो पार्टीको जस्तो समावेसी विधान अरु कुनै पार्टीको छैन नेपालमा । कसैले बहकाउन खोजेका होलान् तर हाम्रा साथीहरु बहकिने छैनन् ।

 

 

प्रतिक्रिया
सम्बन्धित खवर

काठमाडौँ, १९ बैशाख । विश्वमा कोरोना माहामारीका कारण नेपाल लकडाउन भएको १ महिना भन्दा बढी भइसक्यो । यो एक महिनाको

निरोज कुमार थापा, काठमाडौँ, १० असार । सबै मानिसहरु आफ्नो कर्ममा सफल हुन्छन् भन्ने छैन । तर निरन्तरको लगाव, कामप्रतिको

पर्यटन प्रवद्र्धनका लागि सन् २०१७ बाट हरेक वर्ष हिमालय ट्राभल मार्ट आयोजना हुँदै आएको छ । यसवर्ष पनि जुन ६

निरोज कुमार थापा, काठमाडौँ, ६ बैशाख ।  नेपालमा होमस्टेको इतिहाँस लामो छैन। यो अभियानले गति लिएको एक दशक पनि भएको