मोर्चाको आन्दोलनले संविधान रोकिँदैन: उपसभापति पौडेल

विराटनगर, २ फागुन । नेपाली कांग्रेसका उपसभापति रामचन्द्र पौडेलले एमाओवादी मोर्चाको अन्दोलनले संविधान निर्माण प्रक्रिया नरोकिने बताएका छन् ।

प्रेस युनियन मोरङले आज आयोजना गरेको पत्रकार भेटघाटमा उपसभापति पौडेलले एमाओवादी नेतृत्वको ३० दलीय मोर्चाले आन्दोलन गर्दैमा संविधान लेखन प्रक्रियामा कुनै असर नपर्ने बताएका छन् । उनले भने–‘प्रर्दशन त के सुनामी आएपनि संविधान निर्माणको प्रक्रिया रोकिने छैन ।’

पौडेलले विपक्षीलाई संविधान निर्माणमा सहभागी गराउन आफूहरुले संविधानसभा स्थगित् गरेको भन्दै १० दिनको समयलाई सदुपयोग गर्न समेत आग्रह गरे ।

प्रक्रिया सुरु भैसकेकाले नरोकिने बरु आफूहरु उनीहरुलाई पर्खिदै पर्खिदै अघि बढ्ने पक्षमा रहेको बताउँदै आउका पौडेलले भने–‘ हामी अहिले पर्ख र हेरको अवस्थामा छौं । सवै दललाई संविधान निर्माणको कार्यमा सहभागी गराउन लागेका छौं ।’

पौडेलले मधेसी नेताले मधेसको हित नवुझेको बताए । देशको भौगोलिक यर्थात विपरित मधेसी नेताहरुले आफनो राजनीति वचाइ राख्न विभिन्न नारा मात्र दिएको उनको आरोप छ ।