भारतले मनायो ६६औं गणतन्त्र दिवस

न्यूदेल्ली, १२ माघ । भारतले आज ६६औं गणतन्त्र दिवस मनाएको छ । नयाँ संविधान जारी भएको दिनको सम्झनामा हरेक वर्ष २६ जनवरीमा भारतले गणतन्त्र दिवस मनाउने गर्छ ।

गणतन्त्र दिवसका अवसरमा ऐतिहासिक राजपथमा विशेष समारोह आयोजना गरिएको थियो । समारोहमा अमेरिकी राष्ट्रपति बाराक ओबामासमेत सहभागी भएका थिए ।

कार्यक्रममा जल, स्थल र वायु सेनाले शक्ति प्रदर्शन गरेका थिए । महिला सेनाहरुको प्रस्तुति विशेष आकर्षणका रुपमा थिए । यसलाई ‘महिला सशक्तिकरण’को रुपमा लिइएको छ । प्रधानमन्त्री नरेन्द्र मोदीको ‘आइडिया’ अनुसारै महिलाको शक्ति प्रदर्शन गरिएको भारतीय सञ्चारमाध्यमहरुले जनाएका छन् ।

जमिनबाट आकाशमा मार हान्ने मध्य दुरीको आकाश मिसाइललगायतका लडाकु विमान र हतियार पत्ता लगाउने राडारको प्रदर्शनी पनि प्रमुख आकर्षणका रुपमा थिए । गणतन्त्र दिवसका अवसरमा भारतभरको सुरक्षा व्यवस्था कडा पारिएको छ ।