दुर्गम गाउँ कोटामा भाइरल ज्वरोको प्रकोप

तनहुँ, १५ साउन । तनहुँको दुर्गम गाउँ कोटामा भाइरल ज्वरोको प्रकोप देखिएको छ । भाइरल ज्वरोबाट उक्त गाउँका प्रत्येक घरमा ४÷५ जना विरामी भएपछि सिङ्गो गाउँ नै प्रभावित भएको छ ।

गाउँमा रहेको उपस्वास्थ्य चौकीमा स्वास्थ्यकर्मी नहुँदा उपचारमा समस्या परेको स्थानीय कर्णबहादुर गुरुङले बताउनुभयो । गाउँमा स्वास्थ्य चौकी छ, स्वास्थ्यकर्मी छैनन् उहाँले भन्नुभयो, स्वास्थ्यचौकी हुनु र नहुनुको कुनै अर्थ भएन ।

गाउँमा स्वास्थ्यकर्मी नहँदा नवलपरासी जिल्लाको ढोडेनीमा उपचारका लागि लैजानुपर्दा सास्ती भोग्नुपरेको उनले बताए ।

यस सम्बन्धमा जिल्ला स्वास्थ्य कार्यालय तनहुँका निमित्त प्रमुख कृष्णबहादुर मिजारसँग जानकारी लिँदा समस्या भए नभएको स्वास्थ्य चौकीमा बुझी आवश्यकताअनुसारको स्वास्थ्यकर्मी र औषधि पठाइने बताए ।

‘खबर पाएलगत्तै बुधबार नै अहेब प्रमोदकुमार सोतीलाई उक्त क्षेत्रको निरीक्षणका लागि पठाइएको र उहाँबाट पूर्ण विवरण आएपछि औषधिसहितको स्वास्थ्यकर्मी त्यस क्षेत्रमा पठाउने तयारीमा छौँ,’ उनले भने ।