लोपेजलाई साडी

मुम्बई । फेसनको विश्वबजार अहिले साँघुरिँदै गएको छ। सिर्जनात्मक क्षमता भएका डिजाइनरले विश्वभरका सेलिब्रेटीलाई आफूले सिर्जना गरेको पोसाकका सजाउने अवसर पाउने गरेका छन्।

यस दृष्टिकोणमा भारतीय डिजाइनरद्वय फाल्गुनी पिकक र साने पिककलाई भाग्यमानी मानिन्छ। उनीहरूले विश्वविख्यात गायिका एवं नायिका जेनिफर लोपेज, ब्रिट्नी स्पेयर्स, लेडी गागा, पेरिस हिल्टनलगायतका सेलिब्रेटीको पोसाक डिजाइन गरिसकेका छन्।

बलिउडका अधिकांश सेलिब्रेटीको पोसाक डिजाइन गरिसकेका उनीहरूलाई हलिउडलगायत अन्य मुलुकको सेलिब्रेटीको डिजाइन गर्दा भने आफ्नो सिर्जना पूर्ण रूपमा प्रयोग हुन नसकेको खुलासा गरेका छन्।

‘विदेशी सेलिब्रेटीका लागि पोसाक बनाउँदा उनीहरूको चाहना र मागका कारण आफ्नो सम्पूर्ण सिर्जना प्रयोग गर्न गाह्रो हुन्छ’, डिजाइनर पिककद्वयले भनेका छन्।

फेसन डिजाइनमा सफल मानिएका यो जोडीले कुनै न कुनै दिन विश्‍वविख्यात गायिका जेनिफर लोपेजलाई सारीमा उतार्ने लक्ष्य लिएका छन्। जेनिफरको ग्ल्यामरस र सेक्सी छवि सारीमा झनै खुल्ने उनीहरूको भनाइ छ। एजेन्सी