English
Immigration
२२ जेष्ठ २०७१, बिहीबार १७:१२ मा प्रकाशित
काठमाडौं, २२ जेठ । अख्तियार दुरूपयोग अनुसन्धान आयोगले नक्कली एवम् झुटा शैक्षिक योग्यताको प्रमाणपत्र पेस गरी नेपाल विद्युत् प्राधिकरणमा नियुक्ति लिएको अभियोगमा राजकुमार सिन्हाविरुद्ध आज विशेष अदालत काठमाडौंमा आरोपपत्र दर्ता गराएको छ ।
आयोगका प्रवक्ता श्रीधर सापकोटाका अनुसार प्राधिकरणको वरिष्ठ सहायकमा कार्यरत सिन्हाले सुरु नियुक्ति प्रयोजनका लागि भारतको विहारबाट ल्याइएको नक्कली प्रमाण पत्र पेस गरेका थिए ।
विहार इन्टरमिडियट शिक्षा परिषद, भारतबाट सन् १९८८ मा आइएस्सी पास गरेको भनिएको शैक्षिक योग्यताको प्रमाणपत्र नक्कली देखिएकाले आरोपपत्र दर्ता गरिएको सापकोटाले बताए ।
सिन्हाविरुद्ध साविक भ्रष्टाचार निवारण ऐन, २०१७ तथा प्रचलित भ्रष्टाचार निवारण ऐन, २०५९ बमोजिम हुँदैसम्मको दण्ड सजायको माग दाबी गरिएको छ ।
