तुलसीपुर आँखा अस्पतालमा बिरामीको संख्या बढ्यो

दाङ, १६ वैशाख । राप्ती आँखा अस्पताल तुलसीपुर रक्षाचौरमा एक सातायता आँखा सम्बन्धी विभिन्न समस्या लिएर आउनेको संख्या ह्वात्तै बढेको छ ।

आँखा चिलाउने, रातो हुने र बिझाउनेलगायतका समस्या भएका बिरामी उपचारका लागि आउने गरेका हुन् । मौसम परिर्वतनसँगै यस्ता रोगका बिरामीहरूको चाप बढेको हो ।

यस अघि अस्पतालमा ५० देखि १०० को संख्यामा विरामी आउने गरेका थिए । अहिले दैनिक ५०० देखि ४०० सम्म आउने गरेको अस्पतालका नेत्र सहायक शालिकराम गौतमले जानकारी दिए ।

अस्पतालले मौसम परिवर्तनका कारण आँखाका रोगीहरू बढेको जनाएको छ । आँखा सम्बन्धी अहिलेको समस्यालाई महामारीका रूपमा नलिन अस्पतालले सर्वसाधारणलाई आग्रह समेत गरेको छ ।