कोरियामा फेसबुक रिलीजको तयारी अन्तिम

देवेन्द्र सम्बाहाम्फे, कोरिया । विश्वब्यापी सामाजिक संजाल फेसबुकले नेपाली समाजमा पारेको सकरात्मक र नकरात्मक प्रभावलाई बिषय बस्तु बनाएर निर्माण गरिएको नेपाली कथानक चलचित्र फेसबुक रिलिज कार्यक्रम तयारी पुरा भएको छ । चलचित्रको लेखक तथा निर्देशक सुरज सुब्बा नाल्बोका अनुसार पहिलो प्रीमियर शो आगामी जुन १० मा सोल दुङदेमुनस्थित कुकमीन सामुदायीक सभा हलमा सो चलचित्रका निर्माता सुनीलकुमार थापा र नायीका झरना थापा र सुब्बा सहितको उपस्थितिमा हुने छ । ‘हामीले फेसबुकको प्रीमियर शो कोरियामा गर्ने लागेका छौं’ लेखक तथा निर्देशक सुरज सुब्बा नाल्बोले बिहिबार फोनमा भने ‘कोरियाको प्रमुख शहरहरुमा प्रदर्शन पश्चात अस्ट्रेलिया र अमेरिकामा पनि प्रर्दशन हुने छ । ‘ सुब्बाले थपे ‘श्रावण १५ बाट अल नेपाल प्रदर्शन गर्ने तयारी गरिरहेका छौं । ‘

कोरियामा चलचित्र फेसबुकको प्रदर्शनीको जिम्मा भने मोरङ डाइनामिक कमिटिले लिएको छ । कमिटिका अध्यक्ष टंक बानियाँका अनुसार प्रीमियर शोलाई अझ ब्यबस्थित र मर्यादित बनाउनको निम्ति नवराज सिवाकोटीको अध्यक्षतामा ११ सदस्यीय कार्यक्रम संयोजक समिति गठन गरिएको छ । स्थापनाको छोटो समयमा नै थुप्रै समाज सेवा गरेर उदाहरणीय बनेको कमिटिले प्रदर्शनिबाट प्राप्त केहि रकम एनआरएन कोरियाद्धारा संचालित नेपाल हाउसलाई सहयोग गरिने अध्यक्ष बानियाँले बताए ।

पुसान, किम्हे तथा आनसान क्षेत्रमा कार्यरत नेपाली दर्शकहरुको मागलाई ध्यानमा राख्दै जुन १७ मा किम्हेमा र जुलाई १ मा आनसानमा प्रदर्शन गर्ने योजना अयोजकको रहेको छ । ‘नेपालीहरुको उपस्थिति बढी भएको क्षेत्रमा टिकट पठाउने काम भइरहेको छ ‘ कार्यक्रम संयोजक सिवाकोटीले भने ‘प्रीमियर शोका दिन हामीले पन्ध्र सय दर्शकको अपेक्षा गरेका छौं ।’ – ‘रिलिज कार्यक्रमका लागि सबै व्याबस्था मिलाई सक्यौं ‘ उनले भने | किम्हेको प्रदर्शनीसम्म नायीका झरना थापा दर्शकसंगै हुनेछिन् ।

६५ लाख रुपैयाँको लगानीमा एसके थापा प्रोडक्सनको पाचौं प्रस्तुति चलचित्र फेसबुकमा सिङ्गापुरको स्काई पार्कमा र नेपालको बिभिन्न क्षेत्रमा छायाङकन गरिएको छ । नायीका झरना थापा,डेब्यू नायक स्वतन्त्रप्रताप शाह र संयम पूरीको प्रमुख भूमिका रहेको छ । यस चलचित्रमा महानायक राजेश हमाल प्रहरी अधिकृतको भुमिकामा रहेका छन् । सुनील बर्देवाको सङ्गीत तथा छायाङकन संजय लामा,सहायक निर्देशक अराज केशव र योगेन्द्र प्रसाई,सम्पादन बनिश शाह,कोरियोग्राफर कविराज गहतराज,एक्सन रोशन श्रेष्ठ, ब्याकग्राउण्ड स्कोर मोहित मुनाल रहेका छन् ।