सेनाले गुप्तचर विभागलाई शक्तिशाली बनाउने

काठमाडौं, १३ वैशाख । नेपाली सेनाले गुप्तचर विभागलाई शक्तिशाली बनाउने प्रस्ताव तयार गरेको छ । संगठन पुनर्संरचनाको प्रस्ताव सैनिक मुख्यालयले तेस्रोपटक रक्षा मन्त्रालयमा पठाएको छ ।

सैनिक मुख्यालयले पेस गरेको प्रस्तावमा सैनिक गुप्तचर विभाग (डिएमआई) लाई स्तरोन्नति गरेर शक्तिशाली बनाउने, मध्यपृतनाको हेडक्वार्टर घटाएर उपत्यका पृतनामा गाभ्ने, दुई महत्वपूर्ण बलाध्यक्ष र बलाधिकृत विभागको जिम्मेवारी सन्तुलित बनाउने लगायतका रहेको छ ।

सेनाले सैनिक गुप्तचर विभागलाई स्तरोन्नति गरी महानिर्देशनालय बनाउने प्रस्ताव पेस गरेको छ । हाल सहायकरथीले नेतृत्व गरेकोमा स्तरोन्नतिपछि उपरथीलाई नेतृत्व दिने सेनाको प्रस्ताव छ ।

‘राष्ट्रिय सुरक्षामा उत्पन्न चुनौतीको अध्ययन र विश्लेषण गर्न र परिवर्तित परिस्थितिमा काउन्टर इन्टेलिजेन्स थप सशक्त पार्ने गरी प्रस्ताव पेस भएको छ,’ एक सैनिक अधिकृतले भने । नयाँ पत्रिका दैनिकबाट