सेना समायोजनको निर्णयपछि राष्ट्रिय सहमतीको बाताबरण बन्योः खनाल

काठमाडौ, ३० चैत । नेकपा एमालेका अध्यक्ष झलनाथ खनालले  माओबादीका लडाकु र हतियार राज्यको माताहत ल्याउने बिषेश समितीको पछिल्लो निर्णयले राष्ट्रिय सहमतीको बाताबरण तयार भएको बताउनुभएको छ ।
शान्ति र संबिधान निर्माणमा सिराहबासिसँग सुझाब लिन गर्नुभएको बिशेष टेलिफोन सम्बादमा आज  अध्यक्ष खनालले  अब दलहरुबिच सहमतीको उपयुक्त बाताबरण तयार भएको दाबि गर्नुभयो । आफुले उठाउँदै आएको राष्ट्रिय सहमतीको एजेण्डामा  अव कत्ति पनि ढिला नगरी सहमत भएर  संबिधान निर्माणमा  देखा परेका  बिबादहरु समाधान गर्न लागि पर्नुपर्ने उहाँको दावी छ । राष्ट्रिय सहमतीको वाताबरणलाई सदुपयोग गरी शान्ति र संविधानलाई सुनिश्चित गर्नुपर्ने उहाँको भनाई छ ।
आफ्नै निबास डल्लुबाट आज  उहाँले नेकपा एमाले सिराहका अध्यक्ष लिलानाथ श्रेष्ठ, एकिकृत नेकपा माओबादीका जिल्ला ईन्चार्ज हरिनाराण चौधरी, मधेशी जनअधिकार फोरम नेपालका जिल्ला अध्यक्ष  किशोरी  यादब, नागरिक समाजका चन्देब कामती र  महिला प्रतिनिधी सम्झना थपलियासंग सुझाब लिनुभयो ।
सुझाब दिनेहरु सबैले दुई दिन अघि बिषेश समितीले  गरेको निर्णयबाट  निर्धारित समयमै  संबिधान आउने आशा जागेको  बताएका छन् ।  उनीहरुले जनतामा रहेको परिबर्तनको आकांक्षालाई समयमै पूर्ति गर्न सुझाब दिएका छन् ।
सुझाब दिने क्रममा  एमाले सिराहका अध्यक्ष लिलानाथ श्रेष्ठले  राज्यपुरसंरचना गर्दा  स्थानीय तहमा तिन र केन्द्रमा दुई  तहको ब्यबस्था गर्न सुझाब दिनुभयो ।   श्रेष्ठले उत्पीडनमा परेका सबै जनतालाई अधिकार सम्पन्न गराउन सके मात्र नयाँ संबिधानले सार्थकता पाउने बताउनुभयो । उहाँले सिराहमा पछिल्लो तिन महिनाको अबधीमा  ११ वटा अपहरण तथा हत्याका घटनाहरु घटिसकेको जानकारी गराउँदै  शान्ति सुरक्षाका लागि पहल गरिदिन आग्रह गर्नुभयो ।
यस्तै, एकिकृत नेकपा माओबादीका  जिल्ला ईन्चार्ज  हरिनारायण  चौधरीले जनतामा रहेको परिबर्तनको  आकांक्षालाई सम्बोधन गर्नेगरि  समयमै नयाँ संबिधान ल्याउन  आग्रह गर्नुभयो ।  चौधरीले संघियताको अर्थ जनतालाई अधिकार सम्पन्न बनाउनु भएको भन्दै फेरी पनि  अधिकार प्राप्तिका लागि  आवाज उठाउ नपर्ने गरी शिर्ष नेताहरुले पहल गर्नुपर्ने बताउनुभयो ।  उहाँले न्याय प्रणालीको सुधारका लागि  न्याधिसहरु पनि संसदबाट अनुमोदित हुनुपर्ने प्राबधन राख्नुपर्नेमा जोड दिनुभयो ।
मधेशी जनअधिकार फोरम नेपालका जिल्ला अध्यक्ष किशोरी यादबले  मधेश आन्दोलनका क्रममा भएको सहमति कार्यन्वयन कहिले हुन्छ भनि प्रश्न गर्नुभयो । उहाँले  शोषित पिडीत  मधेशि जनता  अधिकार सुनिश्चत हुन्छ की हुदैन भन्दै  नयाँ संबिधान पर्खेर बसिरहेको  जानकारी दिनुभयो ।
नागरिक समाजका प्रतिनिधी चन्द्रदेब कामतीले  जतिसक्दो चाँडो संबिधान निर्माणमा रहेका  बिबादीत बिषयहरुमा सहमती गरेर  जनतालाई आश्वस्त बनाउन आग्रह गर्नुभयो ।
महिला प्रतिनिधी सम्झना थपलियाले  तराईमा  अझै पनि  महिला हिंसाका घटनाहरु घटिरहेको भन्दै नयाँ संबिधानमा महिला अधिकार सुनिश्चत गर्नेतर्फ ध्यानाकर्षण गराउनुभयो ।  उहाँले  जातीय राज्य बनाउनुपर्ने नाजायज मागका पछी नलाग्न नेताहरु सर्तक रहनुपर्नेमा जोड दिनुभयो ।
सुझाब सुनिसकेपछी अध्यक्ष खनालले  सेना समायोजनमा सहमती गर्न बाँकी बिषयहरुमा एक दुई दिनभित्रै  सहमती हुने  भन्दै संबिधान निर्माणमा रहेका  बिबादहरु सुल्झन हप्ता दश दिनको समय लाग्ने  बताउनुभयो । उहाँले नयाँ बर्षको उपलक्ष्यमा  नेपाली जनतालाई संबिधान निर्माणमा रहेका मतभिन्नताहरुमा सहमती गरेर  उपहार दिन शिर्ष तहमा छलफल भईरहेको समेत बताउनुभयो ।  मधेशी  जनताका  सवालहरुमा एमाले संबेदनशिल भएको बताउँदै  नयाँ संबिधानमा मधेशी जनताको अधिकार सुनिश्चित गरिने अध्यक्ष खनालले वताउनु भएको उहाँका स्वकीय सचिब  रामबाबु अधिकारीले जानकारी दिनुभयो । यो विशेष संवाद भोलि पनि जारी रहने छ ।