चैत मसान्तबाट लडाकुका शिविर सेना र सशस्त्रको नियन्त्रणमा

काठमाडौ, २६ चैत्र । माओवादी लडाकुको रेखदेख, समायोजन तथा पुनस्थापना विशेष समितिले अस्थायी शिविरहरु चैत ३० गतेभित्र खाली गरी नेपाली सेना र सशस्त्र प्रहरी बललाई जिम्मा लगाउने निर्णय गरेको छ । लडाकुहरु रहेको १५ मुख्य शिविर र सहायक शिविरमध्ये १२ शिविर सेनालाई र ३ शिविर सशस्त्रको सुरक्षामा नियन्त्रणमा रहने छ ।

समितिका सदस्य तथा अर्थमन्त्री वर्षमान पुनले दिएको जानकारी अनुसार विशेष समिति सचिवालयका पदाधिकारीहरु मुख्य तथा सहायक शिविरमा पुगिसकेका छन् ।

मन्त्री पुनले दिएको थप जानकारी अनुसार विशेष समितिका पदाधिकारीहरु पनि चैत ३० गते मुख्य शिविरहरुमा पुग्ने कार्यक्रम छ । स्वैक्षिक अवकास तथा पुनःस्थापनामा जाने लडाकुका लागि शान्ति मन्त्रालयले २ अर्ब बजेटको माग गरेको भए पनि सरकारले १ अर्बमात्र निकासा दिन सकेको र उक्त रकमको चेक मुख्य तथा सहायक शिविरमा पुगिसकेको छ ।