चितवनको शक्तिखोरबाट लडाकु छनोटको अन्तिम गृह कार्य सुरु

शक्तिखोर, चितवन, २५ चैत्र । चितवनको शक्तिखोरस्थित तेस्रो डिभिजन शिविरमा सेना समायोजन विशेष समिति सचिवालय टोलीले समायोजन, स्वैच्छिक अवकाश र पुनःस्थापनाका लागि पुनः लडाकु छनोट कार्य शनिबारदेखि सुरु गरेको छ ।

चितवनको शक्तिखोरस्थित तेस्रो डिभिजन शिविरमा सेना समायोजन विशेष समिति सचिवालय टोलीले लडाकुका कमाण्डरसँग छनोट कार्यका विषयमा शनिबार छलफल गरेको छ । छनोट कार्यका लागि संयोजक बालानन्द शर्मासहित १३ जनाको कर्मचारी टोली शुक्रबार शक्तिखोरस्थित तेस्रो डिभिजन आइपुगेको थियो । सचिवालयले विकल्प रोज्ने विषयमा लडाकुसँग राय बुझ्न कमाण्डरलाई आग्रह गरेको छ ।

संयोजक बालानन्द शर्माले संचारकर्मिहरुसंग भने,पहिलो छनौटको जिम्मा डिभिजनलाई दिएका छौं त्यसपछि सचिवालयले लडाकुको वर्गीकरण निर्धारण गर्नेछ ।’ सेनामा समायोजन हुन चाहने बाहेकलाई रकम दिने वा पुनःस्थापना प्याकेज रोज्न पाउनेमा लडाकु स्वयंले छान्न पाउने संयोजक बालानन्द शर्माले बताए । टोलीले शनिबार कमाण्डरसँग छनोट कार्य विधिका बारेमा अवगत गराएको र सचिवालयले कार्यालय राखेर आइतबारदेखि काम थाल्ने संयोजक शर्माले जानकारी दिए ।

यसअघि मंसिर पहिलो सातामा पुनर्वर्गीकरण गरेर तेस्रो डिभिजनमा मात्रै २ हजार २ सय १४ जना लडाकुले समायोजन रोजेका थिए । दलहरूबीच भएको सात बुँदे सहमतिअनुसार देशभरका ७ वटा शिविरबाट ६ हजार ५ सय मात्र लडाकुले समायोजन जान पाउने भएकोले पुनः छनोट कार्य सुरु भएको हो । त्यतिबेला सातै शिविरबाट ९ हजार ७ सय ५ जनाले समायोजन रोजेका थिए ।