छोरी मनिला, तिमीलाई फूल मन पर्छ, हगि ! :: एस्पी कोइराला

३० जेष्ठ २०७०, बिहीबार २०:४६ मा प्रकाशित

डोरिस, मालू अनि सिसिलले भनेझैँ
फ्रान्सेली वासन्ती जून हौ तिमी
फिलिपिनो सुगन्धी सुन हौ तिमी
उ सो थुइनले थपेझैँ
प्रेमको प्रथम सम्मोहनसरि
धपक्कै बलेको ‘नीस’ को फूल हौ तिमी
अनि बिन्दुले ठट्टा गरेझैँ
मस्त पेरिसमा हुन गएको शानदार भूल हौ तिमी
साँच्ची छोरी मनिला !
तिमीलाई फूल औधी मन पर्छ, हगि !

छोरी मनिला !
“फ्रेन्च रिभियरा” का गाढा नीलो पानीसित
सेता छालहरू सुसाउँदा होस्
वा अलौकिक ‘आलिकान्ते’ को बिच–बगरका
ताता बालुवामाथि हराउँदा होस्
वा ‘टेनरिफ शान्ताक्रुज’ को सामुदायिक छालसित
उन्मुक्त लहराउँदा होस्
म जलतरङ्गसित
आफैलाई खोज्न तिमीतिर धाउँछु
जब रमिरहेका एक हूल माछाहरूलाई
ह्वेलले निलेको देख्छु
तब म भुरा माछाझैँ चटपटाउँछु
र नछिनेको बोकोझैँ छटपटाउँछु
साँच्ची छोरी मनिला !
तिमीलाई माछा औधी मन पर्छ, हगि !

बान्डोस र माल्बियन द्वीपहरूका रङ्गीन लहरमा
वा पोल्याण्डका प्रोफेसरलाई उल्लू बनाएको ‘क्राकाउ’ को बगरमा
‘ग्रान क्यानरिया लस पाल्मास’ को रहरलाग्दो एटलान्टिक सागरमा
पानीमाथि मोटर कुदेझैँ उडेका समुन्द्री परेवाको बथान देखेर
टाढैबाट तिनैसँग निकैबेर भयानक रमाउँछु
तर अचानक समुन्द्री बाजको अनयास प्रहारले
परेवाभन्दा बढी, म झस्कन्छु
साँच्ची छोरी मनिला !
तिमीलाई परेवा औधी मन पर्छ, हगि !

छोरी मनिला !
यतिबेला म आकाशमा छु
जम्बो जेटको झ्यालमुनि र माथिका पत्रहरूमा तिमीलाई नियाल्छु
अनि सम्झिनै पर्ने अनुहारहरू बिर्सँदै जान्छु
र बिर्सनै पर्ने नामहरू सम्झँदै जान्छु
थाहा छैन—
मन जति टाढा जान्छ उति म तिमीसित नजिकिन्छु
जहाज जति अक्कासिन्छ उति म होचिन्छु
तल कतै टाढा सहरको थोप्लो भेट्छु
र ढुक्कसँग सम्हालिन्छु
फेरि निष्पट्ट अँध्यारोमा
बस्तीहरू मैनबत्तीझैँ बलिरहको/पग्लिरहेको देख्छु
र आफैसँग अत्तालिन्छु
साँच्ची छोरी मनिला !
तिमीलाई मैनबत्ती औधी मन पर्छ, हगि !

म त टाढा छु यतिखेर
र भूगोलको फूलको उद्घोषमा
म तिमीलाई सम्झिरहेछु
तर तिम्रो आस्थाभरिको कलिलो हातले
एउटा काम गर है छोरी मनिला !
‘बिहान’ चाहनेहरूका नाउँमा
फूलचोकीतिर फर्केर
एकजोडी परेवा छाडिदेऊ है
‘चिहान’ चाहनेहरूका नाउँमा
चन्द्रागिरि चढेर
बिजोडी मैनबत्ती बालिदेऊ है !
शब्द व्याख्या :

डोरिस, मालू, सिसिल: एसियाली विकास बैङ्क तत्कालीन सहायक कर्मचारीहरू
उ सो थुइन: एसियाली विकास बैङ्कका बर्मेली कार्यकारी निर्देशक
‘नीस’: फ्रान्सको एक सुन्दर, सुप्रसिद्ध, सामुन्द्रिक सहर ।
बिन्दु: डा. बिन्दु लोहनी, एसियाली विकास बैङ्कका नेपाली उच्चपदस्थ पदाधिकारी
‘फ्रेन्च रिभियरा’: नीस सहरसँग जोडिएको एउटा मनोहर समुन्द्र ।
‘आलिकान्ते’: स्पेनको एउटा पर्यटकीय सुन्दर सामुद्रिक सहर ।
‘टेनरिफ शान्ताक्रुज’: बे वाचको दृश्याङ्कन भएको स्पेन अधीनस्थ सुन्दरतम् टापू
बान्डोस र माल्बियन: माल्दीभ्सका द्वीपहरू ।
‘क्राकाउ’: पोल्याण्डको एक सहर, लेच वालेसाको गृहनगर ।
‘ग्रान क्यानरिया लस पाल्मास’: स्पेन अधीनस्थ मनोहर क्यानरी टापूसमूह ।

प्रतिक्रिया
सम्बन्धित खवर

नेपाली पत्रकारहरुको अन्तर्राष्ट्रिय सञ्जाल (इञ्जा)ले स्रष्टा राजेन्द्र पराजुलीको संस्मरणात्मक कृति ‘कोटेश्वरको केटो’ लाई उत्कृष्ट साहित्यिक कृति पुरस्कार प्रदान गर्ने घोषणा

वरिष्ठ पत्रकार एवं पूर्वमन्त्री होमनाथ दाहाललाई विसं २०७६ को महेन्द्रनारायण निधि राष्ट्रिय पुरस्कार प्रदान गरिने भएको छ । दाहाल विगत

सिओल । नेपाल मुक्तक प्रतिष्ठान कोरिया शाखाले मुक्तक दिवसको अवसर पारेर संयुक्त मुक्तक सङ्ग्रह ‘झिल्को’को विमोचन, बृहत् मुक्तक वाचन, दुई

उसले मलाई जे भनेपनि हुन्छ दुख्ने मुटु उसको मात्रै  पो छ मैले त सब चुपचाप सहनुपर्छ मेरो मुटु खोई मानव