याद राखेस्, काइँला ! -एस्पी कोइराला

१२ चैत्र २०६८, आईतवार २२:४२ मा प्रकाशित

याद राखेस्, काइँला !
(मलाई सुनाइयो—
तिमी धनी भयौ रे
खुसी लाग्यो,) २
तर याद राखेस्, काइँला
करोडपति भएँ भन्दैमा
के तिमी एक सर्को भोक किन्न सक्छौ र !
अरबपति भएँ भन्दैमा
के तिमी एक अर्को लोक चिन्न सक्छौ र !
(किन्ने त आखिर खाने बेलाको एक घान भोजन त हो नि !
चिन्ने त आखिर जाने बेलाको एक थान ओछ्यान त हो नि !२
होइन र !
चाहे तिम्रो होस्
या मेरो !
मलाई सम्झाइयो—
तिमी सम्पन्न भयौ रे
हर्ष लाग्यो, २
तर याद राखेस्, काइँला
हुने–खाने भएँ भन्ने ठान्दैमा
के तिमी एकैचोटि दुई जोर जुत्ता भिर्न सक्छौ र !
सम्पन्न भएँ भन्ने मान्दैमा
के तिमी एकैचोटि दुई जोर खुट्टा हिँड्न सक्छौ र !
लगाउने त आखिर त्यही एक जोडी जुत्ता त हो नि !
हिँडाउने त आखिर त्यही एक जोडी खुट्टा त हो नि ! २
होइन र !
चाहे तिम्रो होस्
या मेरो !
मलाई बुझाइयो—
तिमी ज्ञानी भयौ रे
आनन्द लाग्यो,२
तर याद राखेस्, काइँला
ज्ञानी भएँ भन्ने लाग्दैमा
के तिमी एकैचोटि दुइटा निद थेग्न सक्छौ र !
महाज्ञानी भएँ भन्ने लाग्दैमा
के तिमी एकैचोटि दुइटा सपना भेट्न सक्छौ र !
देख्ने त आखिर त्यही एक सर्को सपना त हो नि !
भेट्ने त आखिर त्यही एक धर्को बिपना त हो नि ! २
होइन र !
चाहे तिम्रो होस्
या मेरो !

मलाई देखाइयो—
तिमी सुखी भयौ रे
गर्व लाग्यो,२
तर याद राखेस्, काइँला
सुखी भएँ भन्ने भ्रम पाल्दैमा
के तिमी एकैचोटि दुइटा ओछ्यानमा सुत्न सक्छौ र !
खुसी भएँ भन्ने अहम् पाल्दैमा
के तिमी एकैचोटि दुइटा चिहानमा अट्न सक्छौ र !
प्रारम्भ त आखिर उही माता–पितामा त हो नि !
अन्त्य त आखिर उही आफूजत्रो चितामा त हो नि ! २
होइन र !
चाहे तिम्रो होस्
या मेरो !

प्रतिक्रिया
सम्बन्धित खवर

गैरआवासीय नेपाली संघ भाषा, साहित्य, संस्कृति तथा सम्पदा समितिको साप्ताहिक कार्यक्रम प्रवासी प्रवाहको चवालिसौ शृङ्खलामा नेपाल प्रज्ञा प्रतिष्ठानका कुलपति गंगाप्रसाद

वाग्मती प्रदेशको राजधानी हेटौँडाबाट साहित्य सङ्गम मकवानपुरले यस वर्ष प्रदान गर्ने साहित्य क्षेत्रमा क्रियाशील २० जनालाई विभिन्न सम्मान तथा पुरस्कारको

काठमाडौँ । साहित्यकार विन्दु अधिकारी ढकाल नवीनतम् कथासङ्ग्रह मावली दिदी लिएर आउनुभएको छ । ढकालको दोस्रो कृतिको रूपमा आएको पहिलो

जिन्दगीको परीक्षार्थीलाई मूल ग्रन्थ बेच्दैन सन्दर्भ पुस्तक पनि बेच्दैन केवल गेसपेपर बेच्छ आजको बजार । विद्रोह चेत बोकेर कविता लेख्ने